Tækniskólinn býður nemendum sem útskrifast úr grunnskóla upp á spennandi leið til stúdentsprófs. Um er að ræða þriggja ára lotubundið nám sem er sérhannað fyrir nemendur sem vilja öflugan undirbúning fyrir háskólanám í tækni- og vísindagreinum.
Námsbrautin heitir K2 , með skírskotun í næsthæsta fjallstind heims. Nafnið vísar því í einstaka áskorun í námi með krefjandi námsfyrirkomulagi og áherslu á verkefnamiðaða vinnu.
Hverri önn er skipt upp í þrjár lotur þar sem tveir áfangar eru kenndir í senn.
Samstarf við háskóla
Námið er skipulagt í samstarfi við Háskólann í Reykjavík (HR) og leiðandi tæknifyrirtæki og er sniðið að aðgangskröfum HR í tækni- og verkfræðideild og tölvunarfræðideild. Þess utan fer hluti námsins fram í húsakynnum HR.
Fjölbreytt val og tengsl við atvinnulíf
Valgreinar nemenda eru iðngreinar að eigin vali í Tækniskólanum og því fá þau einstaka innsýn og færni á fjölbreyttara sviði en ella. Atvinnulífið spilar stóran sess í náminu því nemendur munu vinna lokaverkefni í samstarfi við fyrirtæki í lok hverrar annar.
Einstakt nám
Markmiðið með stofnun brautarinnar er að gefa sterkum námsmönnum einstakt tækifæri til þess að:
undirbúa sig undir tækni- og raunvísindanám á háskólastigi.
fá krefjandi verkefni og þjálfast í því að hugsa út fyrir rammann.
tengjast háskólaumhverfinu og efla tengslanet sitt í atvinnulífinu.